அசுவதி பரணி கார்த்திகை முன்கால்
அத்துணை மீன்களும் அசராசி !
பசுபதி மைந்தன் கார்த்திகைச் செல்வன்
பகுமீன் முக்கால் விடைராசி !
விசும்புறு ரோகிணி சீரிடம் முன்னரை
விளம்பும் விடையின் பெயர்ராசி !
முசுடச் சீரிடம் பின்னரை ஆதிரை
முக்கால் புனர்வசு மிதுனமலோ !
கடைக்கால் புனர்வசு பூசமா யிலியம்
கடகம் என்பதை அறிவாயோ !
விடைநுக மகமும் பூரமும் உத்திரம்
விளம்பும் முன்கால் சிம்மமதே!
குடைவிரி வடபுல உத்திர மீனின்
கடைமுக் கால்கள் கன்னியடி !
முடையாக் கரமெனும் அத்தம் சித்திரை
முன்னரை யாவும் கன்னியடி !
சித்திரை பின்னரை சுவாதி விசாகம்
செவ்விய முக்கால் துலைராசி !
அத்தன் விசாகம் நாலாம் காலுடன்
அனுசம் கேட்டை விருச்சிகமே !
முத்தம் மூலபூ ராடவுத் திராடம்
முன்கால் தனுசு சிலைராசி !
உத்திரா டக்கால் ஒழிபுடன் ஓணம்
அவிட்டம் முன்னரை மகரமடி !
அவிட்டம் பின்னரை சதயம் பூரட்
டாதியின் ஒழிபும் கும்பமடி !
தெவிட்டாத் தேனே ! கேளடி உத்திரட்
டாதியின் இடமோ மீனமடி !
தவிட்டில் உறங்கும் மணியென ரேவதி
தங்கல் மீனெனும் வீடல்லோ !
புவியிடை சோதிடக் கலையறி பெண்ணே !
புலமகள் நீயும் போதருவாய் !
-----------------------------------------------------------------------------------
ஒரு நட்சத்திரத்திற்கு நான்கு பாதங்கள் என்பது சோதிடக் கலை வகுத்துள்ள நியதி ! பாதம் = கால்.
-----------------------------------------------------------------------------------
முன்கால் = முதலாவது பாதம்
அசராசி = ( அசம்=ஆடு ) மேழ ராசி
பசுபதி மைந்தன் = சிவன் மகன் முருகன்
கார்த்திகைச் செல்வன் = முருகன்
பெயரால் வழங்கும் கார்த்திகை நட்சத்திரம்
பகுமீன் = நான்காகப் பகுத்த நட்சத்திரம்
முக்கால் = முதல் மூன்று பாதங்கள்
விடை ராசி = ரிஷப ரசி
விசும்புறு = வானில் விளங்கும்
முன்னரை = முன்னிரு பாதங்கள்
முசுடம் = கீழமை தன்மை
பின்னரை = பின்னிரு பாதங்கள்
கடைக்கால் = கடைசிப் பாதம்
விடைநுகம் = நுகத்தடி போன்ற
குடைவிரி வடபுலம் = ஆகாயக் குடையின் வட திசையில்
கடைமுக் கால்கள் = கடைசி மூன்று பாதங்கள்
முடையாக் கரம் = கைவிரல்கள் போன்ற
துலை ராசி = துலாம் ராசி
அத்தன் = உயர்குணமுடைய
முத்தம் = முத்து போன்ற
சிலை = வில் (தனுசு)
ஒழிபு = எஞ்சியவை
தவிட்டில் உறங்கும் = தவிட்டில் கலந்தாலும் தனியாகத் தெரியும்
புலமகள் = புலமை உள்ளவள்
போதருவாய் = செய்தி அறிவாயாக !
ஆக்கம் + இடுகை,
வை.வேதரெத்தினம்,
ஆட்சியர்,
“கணியப்பாடல்” வலைப்பூ,
[திருவள்ளுவராண்டு: 2053, சிலை (மார்கழி) 11]
{26-12-2022}
-----------------------------------------------------------------------------------------
கருத்துகள் இல்லை:
கருத்துரையிடுக