ஒவ்வொரு கோளும் ஒவ்வொரு ராசியை
ஒவ்வொரு கதியில் கடக்கிறது !
எவ்வித மாயினும் எப்பொழு தாயினும்
எல்லாம் நியதியில் நடக்கிறது !
சந்திர கோளம் தனியொரு ராசியில்
சஞ்சரி நாள்கள் இரண்டேகால் !
வேந்தன் பரிதி விட்புதன் வெள்ளி
விரைவுக் காலம் ஒருதிங்கள் !
உதிரன் செவ்வாய் உழிஞைக் காலம்
ஒன்றரை மாதம் உணர்வாயே !
கதிக்கும் குலகுரு கடக்கும் காலம்
கச்சித மாய்ஓர் ஆண்டம்மா !
இராகும் கேதும் இயங்கும் காலம்
எதிர்வழி ஒன்றரை ஆண்டல்லோ !
பிராணக் கணிதன் சனியின் இயக்கம்
பெருமம் இரண்டரை ஆண்டறிவாய் !
----------------------------------------------------------------------------------------
கோளும் = கிரகமும்
விரைவில் = வேகத்தில்
நியதியில் = குறிப்பிட்ட ஒழுங்கில்
வேந்தன் பரிதி = கிரகங்களுக்கெல்லாம் தலைவனான சூரியன்
விட்புதன் = விண்ணில் உலா வரும் புதன்
உதிரன் = இரத்தத்தின் காரகனாகிய செவ்வாய்
உழிஞைக் காலம் = இயங்கும் காலம்
கதிக்கும் = விண்ணில் இயங்கும்
எதிர்வழி = எதிர்த் திசையில்
பிராணக் கணிதன் = ஆயுள் காரகனாகிய
பெருமம் = மற்ற கோள்களை விட அதிக காலம்
--------------------------------------------------------------------------------------
ஆக்கம் + இடுகை,
வை.வேதரெத்தினம்,
ஆட்சியர்,
“கணியப்பாடல்” வலைப்பூ,
[திருவள்ளுவராண்டு: 2053, சிலை (மார்கழி) 11]
{26-12-2022}
---------------------------------------------------------------------------------------
கருத்துகள் இல்லை:
கருத்துரையிடுக